Shqipëria renditet ndër vendet me një konsum të lartë të duhanit. Statistikat tregojnë se në vend numërohen rreth 900 mijë konsumatorë, që përgjatë një viti llogariten të pinë mbi 6 mijë tonë duhan. Për uljen e konsumit të cigares qeveria vendosi të rrisë akcizën me 20 lekë/paketë. E thënë ndryshe, çdo konsumator pritet që me hyrjen në fuqi të ndryshimeve në ligjin "për akcizat", me 1 janar të vitit 2011, të paguajë minimumi 20 lekë më tepër për çdo paketë të blerë. Por, biznesi vendas edhe pse ligji duhet të hyjë në fuqi në 1 janar të këtij viti, kanë rritur që në ditët e fundit të dhjetorit çmimin e cigareve me 10 lekë. Nga një vëzhgim në disa prej pikave të shitjes më pakicë, çmimi i një pakete Slims sot shitet 160 lekë nga 150 lekë që shitej në ditët e mëparshme.