Nga viti 2000 deri në 2009 Shqipëria ka shënuar 20 pikë në renditjen e arsimit që bën Organizata për Bashkëpunim dhe Zhvillim Ekonomik, duke qenë një nga tre vendet me progresin më të madh.

Fakt ky që u evidentua fort nga Ministria e Arsimit, pak ditë më parë. “Shqipëria është vlerësuar në mesin e tre vende që kanë bërë progresin më të madh në arsimimin e nxënësve në 9 vitet e fundit”, deklaroi ministri Myqerem Tafaj.

Por ky tregues, që krahason progresin e bërë nga viti 2000 deri në 2009, të cilit i referohet ministri i Arsimit, nëse merret i shkëputur paraqet një situatë krejt tjetër nga e vërteta.

Sipas të njëjtit raport PIZA 2009, edhe pse ka qenë një nga 3 vendet me progresin më të mirë, Shqipëria është një nga vendet me nivelin arsimor më të dobët.

Në renditjen zyrtare të PIZA-s, vendi ynë renditet i 6-ti nga fundi i listës së 65 vendeve të marra në studim nga OECD, duke lënë pas vetëm Panamanë, Perunë, Azerbajxhanin, Kirgizstanin dhe Katarin.

Renditja e OECD i klasifikon nxënësit shqiptarë dukshëm më pak të përgatitur se sa fqinjët e tyre bullgarë, malazezë apo serbë, si në shkrim ashtu edhe në matematikë e shkenca të tjera.

Treguesi i progresit në rastin e Shqipërisë rritet artificialisht për shkak të nivelit të ulët të sistemit arsimor.

E thënë ndryshe, për një vend me sistem arsimor të zhvilluar, siç janë vendet e OECD, do të ishte e pamundur që të shënonte një rezultat të tillë si ai i Shqipërisë.