Aleanca Kosova e Re (AKR) vazhdon të insistojë se është larg nga arritja e marrëveshjes për bashkëqeverisje me Partinë Demokratike të Kosovës (PDK). Në një emision televiziv, Mimoza Kusari - Lila deklaroi mbrëmë se pa plotësimin e kritereve të saj, AKR-ja nuk hyn në qeveri. Kryesori është që në qeverinë e re të mos ketë ministra, persona, që janë nën hetime.

"Ju nuk do të jeni pjesë e një qeverie me ministër Fatmir Limajn"?, ishte një pyetje që iu shtrua asaj në emision.

"Po, e saktë është! Unë personalisht nuk do të jem në një qeveri, ku do të ishte edhe zoti Limaj. Ne ka kohë që kemi kërkuar dorëheqjen e tij për shkak të hetimeve", ka thënë Kusari - Lila.

Ajo tha se duhet pritur rivotimin më 9 janar, në mënyrë që të flitet konkretisht për formimin e qeverisë së re.