Kryeministri në dorëheqje i Kosovës, Hashim Thaçi, tha se do të padisë për shpifje raportuesin e Këshillit të Evropës, Dik Marti.

Në një raport të tij, Marti e akuzoi Thaçin se ishte "bos i krimit të organizuar që merret me trafikimin e drogës dhe organeve njerëzore”.

Në një intervistë për agjencinë Reuters, Thaçi tha se raporti synon t’i inkriminojë shqiptarët, por jo vetëm ata.

“Është një shpifje e kulluar që pretendon inkriminimin e dy shteteve, Kosovës dhe Shqipërisë; është një pretendim për t’i inkriminuar të gjithë shqiptarët në rajon. Ai sulmon edhe Shtetet e Bashkuara, NATO-n, BE-në, si dhe Kombet e Bashkuara. Unë do të punoj që raporti të sqarohet deri në fund”, tha Thaçi.

Ai tha se do ta padisë raportuesin e Këshillit të Evropës.

“Dik Marti duhet të përgatisë avokatë të mirë, nëse do të mund të gjejë të tillë për ta mbrojtur, sepse në asnjë rrethanë Dik Marti nuk mund t’i ikë drejtësisë për këtë shpifje, mund të them të kulluar”, i deklaroi Thaçi agjencisë Reuters.

“Qëllimet e këtij raporti janë dëmtimi i imazhit të shtetit të Kosovës, popullit të Kosovës dhe gjithë shqiptarëve në rajon, ngadalësimi i njohjeve të pavarësisë së Kosovës, bllokimi i fillimit të bisedimeve Kosovë-Serbi, si dhe pengimi i ndërtimit të institucioneve të dala nga zgjedhjet e 12 dhjetorit. Pra, është ndërhyrje politike”, tha Thaçi.