Për shkak të vazhdimit të rrshjeve, situata në zonat e përmbytura të Nënshkodrës vazhdon të jetë e rëndë dhe e pasigurt për banorët.
Në komunën e Dajçit, mes dëmeve të shumta janë edhe çarjet e dy argjinaturave, asaj të fshatit Darragjat dhe fshatit Dajç, të cilat vazhdojnë të mbajnë të përmbytura rreth 3 mijë hektarë tokë bujqësore dhe disa qindra banesa në këtë komunë. Ndaj, sipas gjeneral Vladimir Qiriazit, një numër i madh forcash të armatosura dhe mjete të ushtrisë janë përqendruar sot në riparimin e argjinaturës së Darragjatit.
Aktualisht, ndodhemi ne Samrishtin e vjetër, në një pjesë të çarë të argjinaturës së këtij fshati dhe, siç e shikoni, pjesa më e madhe e forcave të armatosure janë përqendruar në këtë pikë, që është edhe një ndër pikat më kritike për momentin. Nga mbyllja e kësaj hapësire të çarë të argjinaturës, tani ne pretendojmë të ndërpresim futjen e ujit në brendësi të fshatit Samrish. Kemi përqendruar më shumë se 60 forca, por edhe mjete që janë të angazhuara në transportimin e rërës, në mbushje thasësh, përdorimin e mjeteve të ndryshme xheniere.
Për kryetarin e Komunës së Dajçit, Arben Gjuraj, krahas vazhdimit të operacioneve humanitare, parësore mbetet mbyllja e çarjes së argjinaturës së dëmtuar.
Kryetari i komunës së Dajçit thotë se, përmbytjet e javëve të fundit ishin më të mëdha se ato të fillim vitit. Sipas tij, në komunën e Dajçit janë përmbytur më shumë se 3 mijë hektarë tokë bujqësore, 1500 banesa dhe 600 biznese apo njësi private, ndërkohë që regjistrohen dëmtime të mëdha në blegtori.