Partizani - Skënderbeu 3-2
(12-25, 25-23, 21-25, 25-16, 15-12)
PARTIZANI: Doda, Ad.Prenga, Shkoza, Qoli, E.Pashaj, Dova, Shehu, A.Pashaj, Marku, Preçi, Fagu. Trajner: R. Tarja
SKENDERBEU: Mizaku, Strati, Shahu, Hoxhalli, Bego, Male, Kola, Grabocka. Trajner: F. Rrapo
Gjyqtarë: I. Fështi, E. Zenullari
Partizani mundi dje pasdite 3-2 Skënderbeun në volejboll për femra, sfidë e vlefshme për javën e 16-të të kampionatit kombëtar. Takimi u luajt në palestrën “Partizani” dhe të dyja skuadrat e kërkuan fitoren, e cila mbeti në dilemë deri në pikët e fundit. Madje korçaret iu afruan asaj, duke kaluar dy herë në epërsi me sete, por në të dyja rastet e arritën nga vajzat e kuqe.
Sfida mbeti e një niveli mesatar, ku ekipet luajtën me hope, duke treguar mangësitë dhe mundësitë e tyre në këtë sezon. Partizani e nis keq ndeshjen edhe për meritë të Skënderbeut, që luan mirë, është më efikas në bllok dhe fiton me diferencë pikësh, 12-25. E menjëhershme kundërpërgjigjja e skuadrës kryeqytetase, që pas pikës së 12-të të setit të dytë shkëputet, udhëheq 24-20 dhe fiton 25-23.
Por loja ndërron shpesh kah, skuadrat nuk ruajnë ritmin për dy sete me radhë dhe këtë herë i takon Skënderbeut të fitojë, 21-25 setin e tretë. Por gjithçka do të zgjidhej në setin final, pasi në setin e katërt loja është tërësisht e Partizanit, që shkëputet që në pikët e para dhe fiton 25-16. Seti i pestë është i ekuilibruar, skuadrat rivalizojnë fort, por vendaset tregohen më të kujdesshme dhe të sakta, duke fituar 15-12 dhe krejt takimin 3-2.