Shtetet e Bashkuara të Amerikës (SHBA) përshëndetin popullin e Kosovës për mbajtjen e zgjedhjeve të para të përgjithshme pas pavarësisë, arritje e rëndësishme në zhvillimet e një demokracie shumë etnike. Partia Demokratike e Kosovës e Kryeministrit Hashim Thaçi fitoi më shumë se 33 për qind të votave, pas një fushate ku morën pjesë 29 parti, sipas rezultateve paraprake të shpallura nga Komisioni i Zgjedhjeve të Kosovës (KQZ).
Partia kryesore e opozitës, Lidhja Demokratike e Kosovës (LDK), mori më shumë se 23 për qind, ndërsa Lëvizja Vetëvendosje (VV) doli në vend të tretë me vetëm 12 për qind të votave. Kryeministri Hashim Thaçi ka tani rreth 90 ditë për të formuar qeverinë e re.
Vëzhguesit e pavarur ishin të pranishëm në qendrat e votimit në gjithë Kosovën dhe thanë se procesi i votimit ishte kryesisht “efektiv dhe efecient”, me gjithë disa parregullsi gjatë numërimit të votave në disa qendra votimi. Ambasadori amerikan në Kosovë, Kristofer Dell, monitoroi 17 qendra votimi, përfshirë edhe një në Skenderaj, ku vuri re se kutitë e votimit ishin mbushur tej masës krahasuar me firmat në regjistër. Shtetet e Bashkuara i bëjnë thirrje komisionit të zgjedhjeve të marrë në shqyrtim ato pak parregullsi që kanë ndodhur. Shtetet e Bashkuara konstatuan me keqardhje atmosferën e kërcënimeve, presionit dhe dhunës nga burimet serbe për javë me radhë ndaj serbëve në veri të Kosovës që i pengoi shumë prej tyre për të ushtruar të drejtën e tyre demokratike, transmeton VOA.
Kosova ka përparuar mjaft që kur trupat e NATO-s ndërhynë në rajon në vitin 1999 për të ndalur fushatën brutale të spastrimit etnik të popullatës shqiptare nga trupat serbe. Pas luftës, Kosova u vendos nën administrimin e Kombeve të Bashkuara. Në vitin 2008 Kosova shpalli pavarësinë nga Serbia. 72 vende, përfshirë Shtetet e Bashkuara dhe pjesën më e madhe të aleatëve të NATO-s e kanë njohur pavarësinë e Kosovë. Serbia dhe Rusia janë përjashtimet më të dukshme.