Ende ka shumë paqartësi rreth marrëveshjes ndërmjet kryetarit të Partisë Demokratike të Kosovës (PDK), Hashim Thaçit dhe atij të Aleancës Kosova e Re (AKR), Behgjet Pacolli, rreth koalicionit për në Qeverinë e ardhshme. PDK-ja nëpërmjet komunikatës, të lëshuar pas takimit, praktikisht lë për të kuptuar se është arritur marrëveshja për koalicion, ndërkohë që Behgjet Pacolli, të shtunën në një intervistë dhënë RTK-në nëpërmjet telefonit e mohon se është arritur ndonjë koalicion.
Ai mbrëmë ka demantuar pohimet e plasuara nëpër medie se është arritur marrëveshja për koalicion ndërmjet PDK-së dhe AKR-së për ta formuar qeverinë e re të Kosovës.
Ndërkohë, sipas RTK-së, nënkryetari i PDK-së, Hajredin Kuçi ka thënë se është arritur marrëveshja në parim, por ende nuk janë përcaktuar për ndarjen e ministrive.