Komisioni Qendror i Zgjedhjeve ka vendosur që të rinumërohen 40 për qind e kutive të votimit, por kjo sipas përfaqësuesit të LDK-së dhe atij të AAK-së në KQZ, nuk është e mjaftueshme, pasi që ata konsiderojnë se vetëm numërimi i tërësishëm do të spastronte gjithë procesin dhe dyshimet për manipulime të votave. LDK-ja ka dorëzuar në KQZ kërkesën për rinumërim të tërësishëm të votave, por kjo kërkesë është hedhur poshtë të shtunën. Ndërkohë edhe ushtruesi i detyrës së presidentit, Jakup Krasniqi në një takim që ka pasur të premten me anëtarët e KQZ-së ka kërkuar që të bëhet rinumërimi i tërësishëm i votave.

Kryetarja e KQZ-së ka sqaruar të dielën se vendimi për rinumërimin e 40 për qind të kutive është marrë bazuar në shënimet që kanë ardhur nga Qendra e Numërimit dhe e Rezultateve, sipas të cilave në këto vendvotime janë evidentuar manipulime të ndryshme, duke filluar nga mospërputhja e formularëve të rezultateve, formularëve të kandidatëve dhe raste kur më shumë ka pasur vota për kandidatin se për partinë.

Për këtë edhe ushtruesi i detyrës së presidentit të Kosovës, Jakup Krasniqi ka kërkuar nga KQZ-ja që të bëhet rinumërim i tërësishëm i votave të kandidatëve të subjekteve politike, por Daka ka thënë se kërkesë zyrtare ka bërë vetëm LDK-ja.