Shtabi zgjedhor i Aleancës për Ardhmërinë e Kosovës, dega Rahovec, përmes një komunikate, ka reaguar duke thënë se struktura të larta nga radhët e LDK-së, kanë vizituar qendra të votimit, duke ushtruar presion mbi vëzhguesit e AAK-së.

“Avdullah Hoti, nënkryetar i Komunës së Prishtinës, i shoqëruar nga pronari i ndërmarrjes “IB-Morina”, Ibrahim Morina, kanë hyrë në qendrën e votimit numër 1620/a në Hoçë të Madhe, ku kanë bërë presion ndaj vëzhguesit të AAK-së që të largohet nga kjo qendër”, thuhet në reagimin e AAK-së.

Sipas AAK-së, vëzhguesit e kësaj partie, anëtarë të KKZ-së, kanë shkuar në vend të ngjarjes dhe kanë konstatuar se nuk ka pasur kurrfarë shkeljesh të rregullave zgjedhore nga ana e vëzhguesve në këtë qendër votimi.

Ndërkaq, AAK u bën thirrje strukturave drejtuese të LDK-së që të mos përpiqen të nxisin zgjedhësit e të mos ndikojnë në demotivimin e tyre.

“Ju bëjmë thirrje qytetarëve të mos bien pre e manipulimeve dhe shantazheve të individëve e grupeve të ndryshme, që synojnë të manipulojnë me realitetin dhe lëndojnë procesin zgjedhor”, thuhet në reagimin e AAK-së.

Deri më tani, AAK ka konstatuar se rrjedha e zgjedhjeve po shkon normal dhe “nuk dëshirojmë të tensionojmë klimën e qetë dhe demokratike që po mbretëron në Rahovec”.