Përmes një komunikate për medie, nënkryetari i Lidhjes Demokratike të Dardanisë, Naser Rugova, ka njoftuar për dorëheqjen e tij nga kjo parti. Këtë vendim, Rugova e arsyeton duke u bazuar në përgjegjësi morale, politike dhe njerëzore.
“Zgjedhjet e 12 dhjetorit ishin një sfidë serioze jo vetëm për Lidhjen Demokratike të Dardanisë por edhe për tërë Kosovën. Procesi që i parapriu këtyre zgjedhjeve po ashtu ishte një sfidë tjetër serioze e cila e ka goditur rëndë Lidhjen Demokratike të Dardanisë. Si rrjedhojë e tërë kësaj fatura të cilën e kemi paguar me 12 Dhjetor ishte shumë e rëndë dhe tepër serioze”, thotë Rugova në komunikatë.
“Është shumë e vërtetë se me 12 dhjetor kanë ndodhur parregullsi në procesin zgjedhor, gjë që e kam thënë edhe në dy deklaratat e mia të kaluara ku kam cekur edhe reagimet e faktorëve relevant ndërkombëtar, dhe që është rrezikuar rëndë kredibiliteti i procesit zgjedhor. Por po ashtu, është e vërtetë e madhe se me 12 dhjetor, Lidhja Demokratike e Dardanisë nuk është votuar nga 40.000 votues që është kuota minimale për ta kaluar pragun zgjedhor”, ka theksuar Rugova.
Në këtë kontekst, siç ka thënë Rugova, edhe nëse iu kthehen ato vota që janë manipuluar, partia e tij përsëri nuk do ta kalonte pragun zgjedhor.
“Çfarëdo pretendimi tjetër dhe çfarëdo fshehjeje prapa detajeve tjera është ikje nga përgjegjësia morale dhe politike për faktin se LDD është bojkotuar nga elektorati i vet”, ka thënë Rugova.
Rugova ka thënë se ka pritur që pas rezultateve preliminare, Kryesia e LDD-së të mbante Këshillin Kombëtar dhe të ofronte dorëheqjen.
“Unë sinqerisht kam pritur se, menjëherë pas rezultateve preliminare, kryesia e Lidhjes Demokratike të Dardanisë do të ftonte Këshillin Kombëtar dhe do të ofronte dorëheqje si akt moral dhe politik. Do të ishte pastaj përgjegjësi e Këshillit dhe e Konventës Kombëtare se si do ta menaxhonte situatën dhe çfarë masash do të merrte në pajtim me situatën”, është shprehur Rugova.
Rugova ka thënë se si njeri, si shqiptar, si prind, si anëtar që nga themelimi i LDD-së e konsideroj se marrja e përgjegjësisë është akti i vetëm moral dhe politik i mundshëm në këtë moment.
“Unë si Nënkryetar i Lidhjes Demokratike të Dardanisë, i zgjedhur me besimin tuaj, nuk mund të fshihem prapa përgjegjësisë që ne si strukturë udhëheqëse duhet ta ndjejmë për performancën tonë në zgjedhje. Konsideroj se ne si Kryesi dhe si shtab zgjedhor kemi shumëçka për të sqaruar para jush dhe se duhet të jemi të sinqertë për gabimet tona. E kam fjalën sidomos për gabimet në raport me ju anëtarë të thjeshtë dhe aktivistë të flaktë të degëve të LDD-së që përherë jeni angazhuar pa asnjë interes dhe të nxitur vetëm nga sinqeriteti juaj”, ka theksuar Rugova.
Ai ka thënë se për këtë edhe e ofron dorëheqjen e tij si nënkryetar i LDD-së, degëve, Këshillit Kombëtar dhe Konventës Kombëtare të LDD-së.
“Nesër, e premte 17 dhjetor, pritet të mbahet mbledhja me degë dhe aty, para përfaqësuesve të degëve, edhe fizikisht do të jap sqarimet e mia për ofrimin e dorëheqjes. I ngelet anëtarësisë dhe strukturave të LDD-së të përcaktohet për hapat e mëtutjeshëm”, ka thënë për fund Naser Rugova, nënkryetar në largim i LDD-së.




Share15