Në një raport të përgatitur për Këshillin e Evropës, Dick Marty pohon se krerët e Ushtrisë Çlirimtare të Kosovës janë përzier në krime lufte dhe tregti ilegale me organe njerëzore. Mirëpo kjo hedhet poshtë kategorikisht nga Bajram Rexhepi, ministër në dorëheqje i Punëve të Brendshme.

"Së pari kjo mund të konsiderohet si trillim imagjinar, sepse nuk ka prezantuar as fakte dhe as burimet e këtyre informatave. Raporti është në koordinim të ngushtë me akuza të ngjashme, që ka bërë edhe shteti i Serbisë. Aq më parë kur dihet edhe qëndrimi antishqiptarit, i zotit Dick Marty”, ka thënë Rexhepi në një intervistë për Deutche Welle.

Sa i përket "Shtëpisë së verdhë", janë bërë 3-4 hetime dhe absolutisht është e palogjikshme që të ketë ndodhë një gjë e tillë, thekson Rexhepi. Sipas tij, ajo është një punë e përfunduar, të cilën Marty sërish e aktualizon.

Sa i përket akuzave për ushtarët e UÇK-së dhe figurat e tanishme politike, sipas Rexhepit, këto janë trillime të cilat ose duhet të argumentohen, ose duhet të pasojë një padi kundër atij që bën një raport të tillë, sepse – shton ai – “edhe europarlamentarët duhet të jenë përgjegjës për deklaratat e veta”.