Prishtinë, 12 dhjetor - KQZ konfirmoi në ora 17.00 se votimet në Kosovë po bëhen normalisht, përjashtuar disa raste të izoluara që nuk kanë penguar rregullsinë e votimeve. Po sipas KQZ-së nuk ka pasur vonesa në hapjen e vendvotimeve, derisa pjesëmarrja në votime e qytetarëve deri në ora 15.30 ishte mbi 34 për qind.

Pjesëmarrja në votim-e kënaqshme

Kryetarja e KQZ-së, Valdete Daka, tek në orët e vona të pasdites, ka dhënë detaje të tjera për procesin votues për zgjedhjet e 12 dhjetorit , duke paraqitur kështu pjesëmarrjen në përqindje të qytetarëve në votime sipas komunave. Daka edhe problemin e llambave ultravjollce e quajti problem momenti, që është zgjidhur menjëherë. Kurse për rastet e problemeve në disa vendvotime, Daka nuk dha ndonjë koment, duke theksuar se eksceset në vendvotime nuk janë përgjegjësi e KQZ-së, por tha ajo se raportet për këto probleme duhet t’i bëjë publike policia e Kosovës. Sipas zyrtarëve të KQZ-së pjesëmarrjen e serbeve e në votime edhe pse jo e kënaqshme, megjithatë, kjo përqindje është e rëndësishme. Ndërkaq në konferencën e parë, pas hapjes së vendvotimeve Daka,bëri të ditur se të gjitha 746 qendrat e votimeve me 2280 vendvotime janë hapur në ora shtatë të mëngjesit pa asnjë vonesë . "Kemi kënaqësinë t'ju informojmë se të gjitha qendrat e votimit dhe vendvotimit janë hapur dhe se procesi është duke u zhvilluar shumë mirë", tha Daka.

Ajo, qartësoi se sikurse edhe në pjesën tjetër, edhe në Veri të Mitrovicës janë hapur vendvotimet."Vendvotimet, si dhe ekipet mobile në komunat veriore janë hapur sipas planit operacional të miratuar nga KQZ-ja për pjesën veriore dhe deri tani gjithçka është duke shkuar me rregull", është shprehur Daka. Kreu i KQZ-së ka bërë të ditur se në Veri ka vendvotime fikse dhe ekipe mobile, ndërsa këto ekipe janë të përbëra nga ndërkombëtarë, por ka edhe shqiptarë. Për shpalljen e rezultateve preliminare, Daka ka përkujtuar se në këtë aspekt nuk ka ndonjë limit kohor dhe se për këtë do të dihet në konferencat e radhës. Ndërkohë, mësohet se KQZ-ja me rezultatet preliminare do të dalë diku pas mesnatës. KQZ-në në orët e paradites të së dielës e vizituan evrodeputetet Doris Pak dhe Ulrik Lunacek, të cilat kanë përgëzuar këtë institucion për organizimin e zgjedhjeve të 12 dhjetorit , njëkohësisht kanë dhënë edhe vërejtjet lidhur me mosfunksionimin e llambave ultravjollce.

Deri në mesditë votuan mbi 250 mijë votues

Mbarëvajtjen e procesit zgjedhor në Kosovë e konfirmuan edhe përfaqësuesit e Demokracisë në Veprim, të cilët po ashtu theksuan se në përgjithësi procesi ka kaluar në frymën demokratike, përjashtuar kështu disa incidente të vogla, sporadike. Ismet Kryeziu, kryesues i organizatave monitoruese të procesit zgjedhor theksoi: “Deri në orën 12 kemi arritur të sigurojmë të dhënat të cilat konstatojnë se 220 mijë 65 qytetarë votuan për partitë e preferuara, kurse marrë si tërësi, përqindja e daljes në votim arrin 15.3 për qind”, tha Kryeziu. Ai më tej në detaje bëri të ditur për rastet e incidenteve në vendvotime duke vënë në theks kështu fshatin Drenovc të Malishevës, ku në oborrin e qendrës së votimit është bërë një përleshje fizike në mes të simpatizantëve të Vetëvendosjes dhe Partisë Demokratike të Kosovës, në Zveçan ekipi mobil e ka mbyllur procesin e votimit për shkak se është penguar nga persona të panjohur, të cilët kanë bllokuar punën e këtij ekipi dhe nuk kanë mundësuar që qytetarët të dalin dhe të votojnë lirshëm në këtë vend.

Kryeziu, qartësoi po ashtu se vëzhguesit e DV-së kanë identifikuara edhe disa parregullsi siç ishte rasti në Komoran, ku janë vërejtur votime të shumëfishta, marrje të nga dy fletëvotime, derisa theksojnë përfaqësuesit e DV-së se janë identifikuar edhe votime në emër të personave të tjerë. Kryeziu, njofton se gjatë orëve të paradites në shumë vendvotime vëzhguesit e DV-së kanë vërejtur edhe disa parregullsi të tjera, të cilat nuk janë shprehje e lirë e demokracisë. “Në disa komuna janë identifikuar raste për të votuar më shumë se një herë, e po ashtu asistime të më shumë se një personi në një votim që zgjon dyshimin për presion gjatë votimit, këto raste janë evidentuar më së shumti në Mitrovicë dhe Ferizaj”, tha Kryeziu.

Ai, paraqiti edhe disa raste të veprimeve jodemokratike ndaj vëzhguesve të Demokracisë në Veprim, duke i kërcënuar ata me largim nga vendi i votimit. Kryeziu në përgjithësi shprehet i kënaqur me përqindjen e daljes në votime të qytetarëve, duke thënë se krahasuar me vitin 2009, në zgjedhjet lokale, përqindja e pjesëmarrjes në zgjedhjet qendrore është me e madhe. BotaSot