Ndonëse dimri dje ishte i pranishëm me gjithë forcën e tij, në kampin e kuq ka pasur “eksplozion”, pasi sipas lajmit të botuar në “Sportin shqiptar”, Ministria e Mbrojtjes ka hapur një proces gjyqësor, ku kërkon rikthimin e markës së Futboll Klub “Partizanit”. Lajmi është pritur me entuzizëm tek tifozeria, pasi këtë proces e shikojnë si fije shprese për një të ardhme ndryshe nga e sotmja. Edhe në radhët e skuadrës është rritur besimi se situata e rëndë që po kalon klubi mund të përmirësohet. Dje ishte e pamundur të kontaktoje me presidentin Albert Xhani, i cili është edhe administrator i shoqërisë aksionare “Partizani” sh.a.

Mësohet se Xhani ndodhet në Greqi, ndërsa pjesëtarët e stafit të afërt bënin të paditurin me këtë proces, ose thënë ndryshe nuk preferonin të bënin komente. Ndërsa ish-trajneri i të kuqve, Bejkush Birçe, i cili në hapat e para ka qenë pranë presidentit Xhani, por prej kohësh kundërshtar kryesor i tij për degradimin që ka marrë ekipi, ka një tjetër pikëpamje. “Personalisht e kam ngritur zërin që në hapat e para, kur filloi asimilimi i klubit. Por askush nuk e vuri ujin në zjarr dhe u arrit deri në atë pikë, sa Partizani doli nga harta e futbollit.