Në ditën e fundit të fushatës, Partia Demokratike e Kosovës (PDK) ka mbajtur thirrjen ë fundit qytetarëve të Pejës nga palestra “Karagaç” nga ku ish-kryeministri Thaçi u ka thënë simpatizantëve të vet që të marrin familjet dhe farefisin ditën e diele dhe të dalin sa më shumë në votime për të votuar një mandat të këtij subjekti për integrimet evropiane të Kosovës. “Dilni e votoni PDK për një mandat për Kosovë evropiane, për liberalizim të vizave, për Kosovën në NATO dhe për t’u afruar në BE dhe OKB”, ka thënë Thaçi. Duke iu referuar vetvetes “si kryeministër i ardhshëm i Kosovës”, Thaçi ka thënë se një tjetër mandat qeverisjeje, Peja, si krejt Kosova, do përfitojë më shumë rrugë e shkolla, kanalizime e ambulanca. “Ne kemi bërë shumë investime kapitale si kurrnjëherë me parë, do vazhdojmë me hapjen e vendeve të reja të punës dhe ngritjen e mirëqenies qytetare. Ne do të vazhdojmë rritjen e pagave për të gjitha kategoritë, duke filluar me punëtorët e universiteteve. Ngritja e pagave të punëtorëve të arsimit fillor dhe të mesëm është tashmë vendim shtetëror dhe fillon nga janari i vitit të ardhshëm”, ka thënë kryetari i PDK-së, duke iu kthyer edhe një herë temës së rritjes së pagave, që është përmendur vazhdimisht gjatë kësaj fushate. Ai ka përsëritur edhe një herë se do të këtë rritje edhe për shërbyesit civilë, policinë, zjarrfikësit, punëtorët shëndetësorë dhe segmente tjera. Kryetari i degës së Pejës dhe kandidat për deputet Adem Grabovci ka thënë se kandidatët e Pejës janë kandidatët më të mirë të Dukagjinit.