Lidhja Demokratike e Kosovës e ka përmbyllur fushatën e saj me një tubim në kryeqytet, me ç'rast drejtuesit e këtij subjekti kanë premtuar ndërtimin e shtetit ligjor, forcim të shtyllave të shtetit, arsimit, shëndetësisë, policisë dhe gjyqësisë, zhvillim ekonomik dhe integrime euroatlantike. Kreu i LDK-së, Isa Mustafa ka kërkuar që të ndëshkohen ata që nuk kanë qeverisur mirë dhe t'i jepet shansë Lidhjes Demokratike të Kosovës. Mustafa gjatë premtimeve të tij ka përmendur edhe respektimin e shtetit nga institucionet e Republikës, si për t'i kujtuar Sejdiut shkeljen e Kushtetutës së vendit, e cila i kushtoi me humbjen e të dy posteve. "Do ta ndërtojmë një shtet i cili do të respektohet nga qytetarët e vetë, i cili do të respektohet nga qeveria e vetë, i cili do të respektohet nga parlamenti i vetë dhe një shtet të cilin do ta respektojnë edhe të tjerët mbi respektin tonë", ka thënë mes tjerash Mustafa. Ai u ka thënë simpatizantëve, veçmas pjesës më vitale të vendit, rinisë, se LDK-ja është parti e cila po profilizohet, po rinohet, parti e cila ka hapur dyert për të rinjtë dhe për këtë, ai u ka premtuar të rinjve se jo vetëm që do të jenë pjesë vitale e LDK-së, por do të jenë edhe pjesë e Qeverisë së Kosovës. Por për këtë, ai ka kërkuar që të ndëshkohen ata që nuk kanë qeverisur mirë dhe t'i jepet shansë LDK-së.