Lideri i Partisë Demokratike të Kosovës (PDK), Hashim Thaçi në tubimin përmbyllës në Prishtinë, ka garantuar se bashkimi kombëtar nuk është premtim elektoral, por është mision i PDK-së, i cili do të arrihet në mandatin e ardhshëm katërvjeçar të qeverisjes. "Sot, po e përmbyllim fushatën për zgjedhjet e para nacionale në Kosovën e pavarur dhe po e hapim kapitullin e fitores së re për Partinë Demokratike të Kosovës. Urime Fitorja demokrat të Kosovës- fitorja është e jona. Gjatë fushatës sonë, ne i dëshmuam botës së civilizuar se kemi traditë të organizimit të zgjedhjeve të lira dhe demokratike. Ne po dëshmojmë se jemi shtet ku respektohen ligjet dhe demokracia. Për këtë duhet të ndihemi krenar të gjithë. Duke u takuar me ju, të dashur qytetarë, anekënd Kosovës në tubimet madhështore të Partisë Demokratike të Kosovës, e kam ndjerë ngrohtësinë, mikpritjen, dëshirën dhe bindjen tuaj për fitore të Partisë Demokratike të Kosovës- për fitoren e Kosovës.