Flamuri shtetëror i Kosovës nuk është përdorur gati se aspak gjatë fushatës zgjedhore nga ana e partive politike, njofton agjencia e lajmeve INA. Pjesa më e madhe e partive politike kanë preferuar gjatë tërë fushatës të ekspozojnë dhe të valëvisin flamurin kombëtar kuq e zi dhe flamujt partiak, derisa në raste të rralla është evidentuar prania e flamurit shtetëror. Simpatizantët e partive politike theksojnë se janë më të predispozuar për të përdorur flamurin kombëtar se sa ate shtetëror. Partitë politike garuese në këto zgjedhje kanë theksuar se ata kanë përdorur flamujt shtetëror, por se nuk kanë arritur që të ndjekin simpatizuesit e tyre se me ç`farë flamuj kanë qenë pjesë të fushatës së zgjedhjeve. Në disa tubime partiake, partitë politike si LDD dhe AAK-Lista LDK Rugova kanë përdorur edhe flamurin e presidentit Ibrahim Rugova. Lëvizja Vetëvendosje! ka qenë subjekti i vetëm politik garues në zgjedhje që në asnjë rast nuk ka përdorur flamurin shtetëror të Republikës së Kosovës.