Afrimi i ditës së diel, kur qytetarët e Kosovës do të vendosin për udhëheqësit e ardhshëm të institucioneve, nuk po e frikëson Komisionin Qendror të Zgjedhjeve (KQZ). Zyrtarët e mekanizmit që organizon zgjedhjet në Kosovë kanë thënë se janë të gatshëm dhe se i kanë kryer të gjitha përgatitjet për mbarëvajtjen e zgjedhjeve. “Të gjitha përgatitjet tona kanë përfunduar. Fletëvotimet janë në depon e KQZ-së. Do të shpërndahen në orët e hershme të mëngjesit të shtunën dhe të dielën”, ka thënë kryetarja e KQZ-së, Valdete Daka.