Tashmë shërbimi për pasaportat e shpejta nuk do të jenë vetëm në Tiranë por edhe në qytete të tjera. Ministria e Brendshme informon se gjatë kësaj jave kompania "Aleat" do të ofrojë shërbimin e ri të prodhimit të përshpejtuar të pasaportës biometrike edhe në qytetet Shkodër, Vlorë, Elbasan dhe Durrës. Sipas ministrisë së brendshme aplikimi për procesin e përshpejtuar të pasaportës biometrike do të mundësohet që nga data 23 nëntor në Shkodër, 24 Nëntor në Vlorë, 25 Nëntor në Elbasan dhe 26 Nëntor në Durrës. Ky shërbim filloi të ofrohet për herë të parë në Tiranë më 8 Nëntor 2010 pranë njësive bashkiake 3, 4 dhe 10. Sipas ministrisë edhe në katër qendrat e reja ku do të ofrohet shërbimi për prodhimin e përshpejtuar të pasaportave biometrike aplikimi u mundësohet të gjithë shtetasve të Republikës së Shqipërisë, të cilët mund të zgjedhin në këtë mënyrë pikën më të afërt për përfitimin e këtij shërbimi. Nëse shtetasi aplikon deri në orën 11:00 pasaporta do të prodhohet në dy ditë punendërsa nëse aplikohet pas orës 11:00 pasaporta do të prodhohet për tre ditë. Ndërkohë pasaportat e prodhuara në mënyrë të përshpejtuar do të mund të tërhiqen nga qytetarët pranë drejtorive të Policisë së Shtetit në këto qarqe.