Plot katër gola ka shënuar Hamdi Salihi, sulmuesi shqiptar i Rapidit të Vjenës, në ndeshjen e radhës në kampionatin austriak, të shtunën, ndaj LASK Linzit, ku aktivizohet një tjetër futbollist shqiptar, Klodian Duro. Kësisoji, derbi shqiptar i Bundesligës Austriake është “vulosur” nga goleadori i njohur shkodran, Salihi, i cili ka hedhur “KO”, në tapet, shokun e tij të kombëtares, Duron, bashkë me skuadrën e këtij të fundit, LASK Linz. Në prani të rreth 15 mijë tifozëve, në “Hanappi-Stadion“, janë ballafaquar Rapidi i Vjenës dhe LASK Linz, ndeshje e cila ka dhuruar bollëk golash dhe një mbrëmje të shkëlqyer për sulmuesin e kombëtares kuqezi, Hamdi Salihi. I cili e ka hapur serinë e katër golave të tij në këtë sfidë në minutën e 11-të, për të dyfishuar shifrat në minutën e 45-të. Kaq, për pjesën e parë. Por ka pasur gola të tjerë edhe për pjesën e dytë, nga Salihi, që ka trefishuar rezultatin për kryeqytetasit vjenezë, në minutën e 76-të, ndërkohë që ka vulosur fitoren 5-0, me golin e tij të katërt personal, në minutën e 90-të. Kujtojmë se golin e katërt për Rapidin e Vjenës e ka shënuar Gartler, në minutën e 87-të.
Salihi është aktivizuar me kohë të plotë në këtë ndeshje, ashtu si edhe Duro, por ky i fundit është ndëshkuar me një karton të verdhë. Ky shpërthim i Salihit vjen në të njëjtën ditë, kur mediat austriake flasin për një tratativë mes dy klubeve në fjalë, Rapidit dhe LASK Linzit, që sulmuesi shkodran të kalojë në radhët e këtyre të fundit, ku bën pjesë edhe Klodian Duro, në këtë edicion. Merret vesh se Rapidi i Vjenës po këmbëngul për sulmuesin Kragl, me qëllim që ta bëjë të vetin dhe pastaj të shesë Hamdi Salihin tek LASK Linz. Trajneri i Rapidit, Peter Pakult, duket se nuk e pëlqen më sulmuesin kuqezi, i cili, në fakt ia ka dhënë përgjigjen e merituar me këto 4 gola në kohën dhe në vendin e duhur, ndaj për merkaton e janarit ka shpallur objektivin e vet, për të marrë sulmuesin e LASK Linzit, Lukas Kragl. 20-vjeçarin e shpejtë e sheh si partnerin ideal të holandezit Venegor of Heselink, në sulmin e Rapidit të Vjenës, ku Salihi do të ishte i tepërt. Për të siguruar shërbimet e talentit austriak, stafi teknik i Rapidit po mendon që përveç parave, të përfshijë në marrëveshje edhe Hamdi Salihin, pavarësisht se sulmuesi shkodran është konfirmuar si një bomber i vërtetë te vjenezët: Mjafton të kujtojmë faktin kokëfortë se, prej transferimit nga Riedi për tek Rapidi i Vjenës, më 31 gusht 2009, ai ka realizuar 28 gola në 36 ndeshje. Në këtë sezon, Salihi e ka gjetur 7 herë (4 gola i realizoi ndaj LASK Linzit), në 15 ndeshje, duke qenë golashënuesi më i mirë i skuadrës.