Partizani ka arritur të shtunën të sfidojë të gjithë parashikuesit, madje edhe vetë beratasit, që para ndeshjes deklaronin se të kuqtë nuk kanë asnjë shans. Por falë formës së mirë të portierit Dashamir Xhika dhe kompaktësisë së ekipit në fazën mbrojtëse, Partizani merr një pikë “të artë” ndaj Tomorit. Edhe në Berat të kuqve u janë dashur të durojnë sërish gjykimin e lezhjanit Edvin Hoxha, që ashtu si në Pogradec, edhe të shtunën akordoi një penallti në disfavor të kryeqytetasve. Modeli i penalltisë së Pukës ka funksionuar edhe në Berat, pasi të kuqtë hutojnë me pëshpërima kundërshtarin, që gjuan nga pika e bardhë, ndërsa portieri Dashamir Xhika kryen detyrën. Penalltia që i priti Çaushajt të Tomorit është e dyta për “gardianin” Xhika, ku në të dy rastet Partizani arrin të marrë pikë nga duart e tij. “Në çdo ndeshje Partizani luan futboll të pastër, por në transfertë, përveç kundërshtarëve, na duhet të sfidojmë edhe gjyqtarë të tipit Hoxha, i cili në dy ndeshje që na ka gjykuar (Pogradec dhe Berat) na ka penalizuar me penallti të paqena. Edhe kësaj radhe funksionoi metoda e transfertës së Pukës dhe në këtë mënyrë askush nuk do t’i shënojë Partizanit nga pika e bardhë. Ndaj Tomorit morëm një pikë me shumë vlera dhe për këtë kemi marrë edhe duartrokitjet e publikut beratas, të cilët dua t’i falënderoj për sportivitetin që treguan ndaj Partizanit. Ndonëse dihet problematika e klubit, Partizani ka treguar vlera në javët e fundit dhe shpresojmë që këtë rrugë ta ruajmë edhe në pjesën në vazhdim. Pa dyshim pika që morëm në Berat nuk mund të ketë vlerë nëse nuk shoqërohet me një tripikësh në takimin e radhës,”- u shpreh për “Sportin shqiptar” portieri i të kuqve, Dashamir Xhika, i cili në Berat u cilësua heroi i takimit.