Kjo ngjarje e shëmtuar ka ndodhur në momentin kur të gjithë lojtarët, së bashku me arbritrat, po u drejtoheshin dhomave të zhveshjes. Presidenti Bizhdili ka rrëmbyer një tavllë, e cila ndodhej pranë tij dhe e ka gjuajtur atë drejt kryesorit Sino. Fatmirësisht, tavlla është përplasur në fillim në tubin e hekurit që pengon tifozët të futen në fushë, ku edhe është thyer, e copat e thyera më pas kanë kapur arbitrin fierak. Ai është shoqëruar menjëherë në dhomat e zhveshjes, duke marrë dhe ndihmën e parë nga mjeku i ekipit laçian dhe ka qëndruar aty për më shumë së 45 minuta. Ndërkohë që presidenti Nexhat Bizhdili dyshohet se ka nxjerrë edhe pistoletën e tij, por menjëherë është izoluar nga forcat e shumta policore që ishin në tribunën e stadiumit të Laçit. Menjëherë pas kësaj, ai nuk është lënë të dalë i lirë nga dera kryesore e tribunës, por i shoqëruar nga forcat e shumta të policisë. Numri 1 i klubit kavajas është mbajtur jo më shumë se një orë në ambientet e komisariatit të policisë së Laçit dhe më pas është lënë i lirë, kjo dhe falë ndërhyrjeve të prefektit Pal Dajçi. Përveç këtij rasti, asgjë tjetër nuk ka ndodhur në stadiumin e Laçit. Ndërkohë, nga ana e policisë është mohuar kategorikisht që Bizhdili të ketë pasur armë dhe t’ia ketë nxjerrë arbitrit të ndeshjes në momente nervozizmi. Për sa i përket takimit, heroi ka qenë Elio Shazivari, i cili ka shënuar golin e fitores minimale të Laçit në minutën e fundit të ndeshjes. Kurbinasit kanë marrë kështu 3 pikë të çmuara, duke lënë Besën e Gerti Haxhiut sërish në vendet e fundit të tabelës.