Këtë e bëri të ditur dje në Tiranë, komisionerja për Çështjet e Brendshme në Komisionin Evropian, Cecilia Malmstrom, gjatë një vizite në Tiranë katër ditë pasi BE-ja vendosi të heqë vizat me Shqipërinë. Në vizitën e saj në vendin tonë, Malmstrom e shoqëruar nga Sekretari i Shtetit për Migracionin dhe Azilin në qeverinë e Mbretërisë së Belgjikës, Melchior Wathlet, zhvilloi takime me ministrin e Brendshëm, Lulzim Basha, kryeministrin Sali Berisha, studentët e Universitetit Europian të Tiranës dhe iu përgjigjën interesimit të medias përmes një konference shtypi. Nëtakimin me studentët, Malmstrom tha se "heqja e vizave është një vendim i rëndësishëm. Që nga 15 dhjetori, ju do të jeni të aftë të përfitoni nga ky vendim i rëndësishëm, por duhet të dini disa limite dhe autoritetet do t`ju informojnë. Ju duhet të keni një pasaportë diplomatike dhe regjimi i vizave është i rëndësishëm, pasi keni mundësi të vizitoni vende të rëndësishme dhe jo të qëndroni e të punoni, por një mundësi për të udhëtuar. Shpresoj ta përdorni në mënyrë korrekte". Ndërsa zyrtari i lartë belg, në komunikimin me studentët vlerësoi punën e ministrit Basha në gjithë këtë proces. "Falënderoj kolegun Basha për angazhimin dhe energjinë për të arritur te liberalizimi i vizave", tha Wathlet. Sipas tij, "ne u dhamë ju një sinjal dhe ky është sinjali i besimit. Duam që ju ta vërtetoni që ne kishim të drejtë, kishim besim te ju. Kjo kontratë nuk duhet keqpërdorur, pra qytetarët shqiptarë nuk duhet të shkojnë në vendet e BE-së, të kërkojnë benefite shoqërore, të kërkojnë punë atje, apo të kërkojnë të rrinë më gjatë se sa periudha 3-mujore në një periudhë 180-ditore". Në konferencën për shtyp, komisionerja për Çështjet e Brendshme bëri sërish thirrje që të mos shkelen detyrimet nga qytetarët që do të kalojnë kufirin me pasaportën e re biometrike. Ajo theksoi se qytetarët nuk duhet të kërkojnë punë dhe s'mund të rrinë më shumë se 90 ditë brenda gjashtë muajve në vendet e BE-së. "Ne kemi qenë tepër të qartë, në rast se do të ketë abuzim sistematik, e përsëris sistematik të procesit, atëherë po i gjithë procesi do të rishikohet. Kushtet janë tepër të qarta, nuk do donim që ato të thyheshin. Prandaj kemi ardhur sot këtu, unë me kolegun tim belg dhe po ashtu kemi ardhur për t'u informuar ju se cilat janë këto kushte të liberalizmit të vizave. Ne do mbështetemi të qeveria shqiptare që ajo të bëjë pjesën e saj përsa i përket informimit. Ju lutem, ju lutem mos na zhgënjeni", tha më tej Malmstrom në komunikimin me mediat. Nga ana e tij, ministri Basha theksoi se qeveria i ka dhënë përparësi informimit të qytetarëve. Në takimin e mesditës, kryeministri Berisha garantoi komisioneren dhe sekretarin e Shtetit belg se qeveria është e angazhuar të shmangë të gjitha efektet negative të këtij procesi.