Sulmuesi i Vllaznisë, Vioresin Sinani, është shënuesi më i mirë i të gjitha kohërave Një qytet i tërë është krenar me të. Ka arritur t’i kënaqë shumë herë. Vioresin Sinani është heroi i Vllaznisë së viteve ‘90 ‘00. Të dielën ka shënuar golin e 200 të në historinë e kampionateve shqiptare të futbollit, madje me Elbasanin shënoi dy herë dhe shifra shkoi në 201. “Kam mbajtur prej vitesh rregullisht golat e këtij sulmuesi, mbase duke e pasur të qartë në mendje se do të ishte gjithnjë njësh me golin.Për të hyrë edhe në histori. Jo më kot, kam hulumtuar edhe për golat e sulmuesve të tjerë të spikatur të kampionatit në vite. Nga ajo çfarë kam arritur në konkluzion është se shifrën 200 të golave nuk e ka arritur as i madhi Panajot Pano. Këtë shifër golash nuk e ka kapur as Ilir Përnaska, as Agim Murati, Agustin Kola e ndonjë golashënues tjetër i mirëfilltë. Dyshimi i vetëm është për Refik Resmjen.Mungesa e statistikave të sakta të viteve ‘50 lë pak vend për diskutim në këtë mes, por nga ato çfarë kemi zbuluar, është se Resmja është diku afër kësaj shifre,” - shprehet staticieni i futbollit, Ymer Striniqi. Ndërkohë, golat e Vioresin Sinanit janë të gjithë të evidentuar, të saktë dhe pa asnjë dyshim. Ai deri më sot e ka dërguar topin plot 201 herë në rrjetat kundërshtare në ndeshjet e kampionatit.Të 199 tin gol e kishte shënuar para 4 javësh në Kavajë ndaj Besës. Pas asaj ndeshjeje, pati një trysni jo të vogël ndaj tij për golin e 200 të, por Viori nuk e duron këtë trysni. Eshtë shumë i ndjeshëm dhe, për rrjedhojë, në tri ndeshjet e radhës, nuk arriti ta dërgojë topin në rrjetë. Dëshira për ta bërë këtë gjë ishte e madhe tek ai vetë. Megjithatë, në prag të ndeshjes me Elbasanin nuk premtoi asgjë, sepse nuk ka qejf të japë premtime.