Presidenti i Republikës, Bamir Topi priti sot Drejtorin për Ballkanin Perëndimor në Drejtorinë e Përgjithshme për Zgjerim në Komisionin Evropian, Pier Mirel, i cili i prezantoi Kryetarit të Shtetit Raportin vjetor të Përparimit të KE-së lidhur me statusin e Shqipërisë si vend kandidat për integrim.


"Ky Raport Përparimi duhet të shërbejë si një zile për zgjim", - tha Mirel, duke nënvizuar rolin moderator të Presidentit si garantues i respektimit të Kushtetutës dhe ligjeve në fuqi duke promovuar konsensusin dhe rivendosjen e dialogut normal politik.


Ndërkohë kreu i shtetit, Bamir Topi theksoi se politika duhet të jetë e vetëdijshme për sfidat që e presin në përmbushje të plotësimit të detyrimeve që dalin nga raporti.


"Duke parë edhe detyrat e përgjegjësitë që na shtron përpara ky Raport vjetor i Përparimit, të gjitha institucionet dhe klasa politike duhet të jenë të vetëdijshme për të punuar me seriozitet dhe përkushtim maksimal që të përballojnë me sukses këto sfida në dobi të zhvillimit dhe të së ardhmes evropiane të popullit shqiptar"- tha Topi.