Ish presidenti i Republikës së Shqipërisë, Alfred Moisiu, më 28 nëntor, në ditën e festës së Flamurit Kombëtar, do të shpallet qytetar nderi i komunës së Lipjanit. Kryetari i komunës së Lipjanit, Shukri Buja ka thënë se ky vendim do të procedohet edhe në mbledhjen e ardhshme të Asamblesë Komunale, ku pritet të bëhet edhe miratimi i këtij propozimi. “Unë kam pasur dy herë takime me ish presidentin shqiptar Moisiu ku jemi dakorduar që ai të shpallet qytetar nderi i Lipjanit më 28 nëntor në Ditën e Flamurit. Ne kemi marrë këtë veprim për faktin se në periudhën sa ka qenë në krye të shtetit shqiptar, Moisiu, Kosova pati fituar shumë përkrahje në fusha të ndryshme”, ka thënë ndër të tjera Buja.