Në orën 14:00, në Kavajë, ka filluar ndeshja tjetër e javës së 10-të të superligës, e inkuadruar për ditën e shtunë, ku Besa ka pritur Kastriotin e Krujës. Pjesa e parë e kësaj sfide ka përfunduar në barazim, 0-0, me një epërsi të lehtë të vendësve, por pa qartësinë dhe finalizimin e duhur, për të dalë te goli. Që bën edhe diferencën reale në sportin e futbollit. Edhe pjesa e dytë ka vijuar në këtë linjë, me kavajasit që lakmojnë më shumë kuadratin e portierit krutan, Halili, por pa pasur shanset e duhura për të konkretizuar dhe arritur fitoren, E cila, në njëfarë mënyre, i është kthyer në një makth në këtë kampionat, më shumë, cuditërisht, kur luan në fushën e vet. Nga ana e vet krutanët janë mbrojtur mjaft mirë, kanë arritur ta mbajnë kundërshtarin larg portës së tyre, por nuk kanë munguar edhe të kundërsulmojnë. Natyrisht, pa arritur ta nxjerrin edhe ata, si kavajasit, në dritë golin, cka e ka lënë të pandryshuar barazimin e bardhë të fillimit të lojës. Kësisoji, Besa dhe Kastrioti kanë ndarë nga një pikë në stadiumin kavajas, ku miqtë duket se kanë mbetur më të kënaqur, për faktin se kanë luajtur në një transfertë të vështirë. Besa, në këtë mënyrë, vijon të notojë në ujëra të turbullta të fundit të klasifikimit, ndryshe nga një vit më parë, kur rivalizoi denjësisht me Dinamon për të dy trofetë, titullin kampion dhe Kupën e Shqipërisë. E fitoi këtë të fundit, ndërsa për titullin u dorëzua rrugës, në fazën e tretë. Këtë kampionat, skuadra kavajase, që ka ndërruar edhe trajner (iku Shpëtim Duro dhe erdhi Përparim Daiu), duket se do të luftojë për mbijetesë. Edhe pse është shumë herët për të folur për përefundime të tilla.