Ndërkohë, në stadiumin “Loro Borici” është luajtur ndeshja Vllaznia-Elbasani, e cila ka përfunduar me rezultatin 3-0, me gola të shënuar nga Nallbani, në minutën e 9-të dhe një dopietë të Sinanit, në minutat e 23-të dhe 31-të. Goleadori i njohur kuqeblu ka thyer cdolloj rekordi, sa u takon golave personalë, të shënuar në kampionatin shqiptar, teksa ka rregjistruar plot 201 të tillë. Dygolëshi ndaj verdhebluve ia ka dhënë këtë mundësi, e cila përbën një krenari të madhe jo vetëm për vetë lojtarin dhe Vllazninë, por për tërë futbollin shqiptar, që ka në gjirin e vet një sulmues të tillë.

Tre gola ka realizuar Vllaznia, për të marrë 3 pikë të cmuara, që e rendisin atë në vendin e 6-të të superligës, pas javës së 10-të, me pikë të barabarta me Shkumbinin, por me golaverazh më të dobët se peqinasit. Në këtë mënyrë, duket se ka mbërritur edhe kthesa e duhur për Vllazninë, e cila, nga ana tjetër, ka fundosur më keq Elbasanin, që mbyll klasifikimin me vetëm 6 pikë. Cka e bën ndeshjen e fundit të fazës së parë të këtij kampionati, fundjavën e ardhshme, në “Ruzhdi Bizhuta“, me Flamurtarin, “për jetë a vdekje“. Ku vetëm 3 pikët japin sadopak shpresë për të ardhmen e verdhebluve, që po kalojnë nga njëri dështim në tjetrin, në këtë edicion. Shumë larg emrit të krijuar. Kujtojmë se këto dy ndeshje të së dielës ishin të inkuadruara për javën e 10-të të superligës, e cila e ka ngritur siparin e vet një ditë më paë, të shtunën, me 3 ndeshjet e para, dhe do ta ulë siparin e saj të hënën, me sfidën përmbyllëse, Teuta-Bylis.