Java e 10-të e superligës e ka ulur siparin e vet me një goleadë në Durrës. Aty ku janë rrumbullakosur 23 gola në këtë javë, në 6 ndeshje. Rekord më vete ky! Aty, ku Teuta ka shkatërruar totalisht Bylisin e Ballshit, në ndeshjen përmbyllëse të javës së 10-të, luajtur të hënën në “Niko Dovana”. Një goleadë e jashtëzakonshme për “përmasat” e Teutës së këtij sezoni, që tregon nga ana tjetër brishtësinë e mallakastriotëve, të sapongjitur në superligë, ku do ta kenë thuajse të pamundur për të mbijetuar me kësi ecurie. Plot 6 gola kanë realizuar durrsakët e drejtuar nga trajneri shkodran, Edi Martini, në portën e Bylisit, duke e bërë këtë të fundit të “kapitullojë”, apo të “flasë me vete”. Sepse, humbja e tyre, me rezultatin 6-0, jo vetëm është më e thella e këtij kampionati, por mund të mbetet e tillë, në shifra tenistike, deri në fund të garës, si një njollë e madhe për ballshiotët, që kanë në drejtim ish-trajnerin e kombëtares së Maqedonisë, Nikola Ilievski. E kundërta, fjalët më të mira shkojnë për “djemtë e detit”, një ekip i përbërë me lojtarë të rinj dhe pa emër, por që përmes Teutës kërkojnë të afirmohen. Dhe ia kanë arritur ta mbajnë skuadrën durrsake në pozita mjaft të mira në klasifikim, në të njëjtën kuotë pikësh me Tiranën, 15 pikë. Pjesa e parë e ndeshjes është mbyllur me fitoren 3-0 të vendësve, të cilët, në fraksionin e dytë, kanë realizuar edhe tre gola të tjerë, duke vulosur fitoren e thellë, 6-0 ndaj Bylisit, që mbetet në pozita kritike, së bashku me Elbasanin, në fund të renditjes së klasifikimit.