Burim Kukeli me Luzernin dhe Xherdan Shaqiri e Beg Ferati me Baselin, u ndanë baras 1:1, në ndeshjen e derbi të javës së 14-të të Superligës së Zvicrës në futboll.

Kukeli është paraqitur nga minuta e 46-të në vend të Paivës, ndërsa Shaqiri luajti deri në minutën e 46-të kur ndërrohet nga Tembo, kurse Ferati ka qenë i plotë.

Të parët udhëhoqën me rezultat 1:0 vendasit me golin e shënuar nga futbollisti Ferrera, ndërsa në minutën e 90+4 Baseli barazoi nëpërmjet Almerares-it.

Baseli mori një pikë të rëndësishme, e cila e mban në kreun e tabelës me 26 pikë ose një pikë më shumë se i dyti Luzerni dhe i treti Zurich-u. Të tre shqiptarët: Kukeli (Luzern) e Shaqiri e Ferati (Basel) treguan lojë mjaft të mirë. Në kampionatin zviceran tri klubet që luajnë shqiptarët luftojnë për titull, pra edhe Zurich që ka në mjedisin e vet Admir Mehmedin e Adrian Nikçi.

Në Challange League, mesfushori i talentuar shqiptar nga Kosova, Labinot Sheholli ka shënuar tre gola apo si i thonë në zhargonin sportiv, het-trik në fitoren e thellë të Biele-Bienne kundër Aarau (7:1).