Kur dukej se kishte lënë pas dëmtimin në gju dhe po rifitonte formën e mirë, kapiteni shqiptar i Sunderlandit, Lorik Cana, duhet të qëndrojë dy javë jashtë fushës, si pasojë e një pezullimi.

Megjithatë, Cana kërkon nga skuadra që t’ia dalë mbanë edhe pa të në dy javët e ardhshme, kundër Manchester Cityt dhe Birmingamit. Mesfushori kuqezi u ndëshkua me karton të verdhë në ndeshjen e së martës ndaj Boltonit dhe është pezulluar për dy javë.

Për Sunderlandin do të rikthehen pas dëmtimeve të gjata Jordan Henderson dhe Andy Reid. “Kush e di, mbase ata mund të jenë gati këtë fundjavë. Unë do jem i pezulluar për dy javë dhe këta lojtarë do të na bëjnë shumë punë”, tha Cana, i cili e konsideron të padrejtë kartonin e marrë në ndeshjen me Boltonin.

“Nuk mendoj se e meritoja atë karton, pasi ishte faulli im i parë gjatë ndeshjes. Jam shumë i zhgënjyer që nuk do të jem në fushë në ndeshjet me Cityn dhe Birmingamin, por tani nuk kam çfarë të bëj më. Kjo është pjesë e futbollit. Tani do të bëj gjithçka që të mbështes shokët e mi nga jashtë. Mendoj se ekipi ka cilësi të mjaftueshme për të bërë mirë edhe pa mua”, shtoi Cana.