Didië Drogba shënoi dy gola duke e ndihmuar Çelsin të fitonte 4-1 kundër Uest Hem Junajtid dje dhe të kthehej sërish në krye të Premier Ligës. Dy javë pasi u mund 4-2 nga Mançester Siti në një ndeshje të fortë në “Stamford Bridge”, Çelsi rizbuloi formën e vet të mirë dhe me Florent Maludan në ditë të shkëlqyer, siguroi tri pikët e rëndësishme.

Dy golat e shënuar nga Drogba dhe një nga Maluda i dhanë goditjen e rëndë Uest Hemit të rrezikuar nga rënia nga kategori më poshtë. Skuadra e drejtuar nga trajneri italian Xhianfranko Zola kishte barazuar më parë me Skot Parker, pas golit të Aleks me kokë. Çelsi tani shkoi në kuotën e 64 pikëve nga 29 ndeshje, aq sa Arsenali, ndërsa Mançester Junajtid, që pret sot Fulhemin, ka 63 pikë. “Ne luajtëm mirë dhe patëm shumë shanse, njëkohësisht e mbajtëm ndeshjen nën kontroll”, ka thënë Karlo Ançeloti pas ndeshjes. “Ne duhet të luajmë kështu çdo ndeshje”, shtoi trajneri i Çelsit. Arsenali fitoi 2-1 në fushën e Hullit, në sajë të golit të shënuar në minutën e fundit nga Niklas Bendnter. Arshavin kaloi në avantazh “topçinjtë”, ndërsa Xhimi Bulard barazoi për Hullin, i cili luajti gjithë pjesën e dytë me dhjetë futbollistë, pas kartonit të kuq të marrë nga Zhorzh Boateng.

Dy gola të shënuar nga Roman Pavljuçenko e ndihmuan Totenhemin e vendit të katërt që të bënte një hap më tej drejt vendit të katërt pas fitores 3-1 kundër Blekbërn Rovers. Aston Vila, rivale e Totenhemit për vendin e katërt, humbi terren pas barazimit 0 0 kundër Stok Sitit. Mançester Siti i vendit të pestë luan sot kundër Sandërlendit. Bërnlei duket se do të kthehet prapë në kategorinë e dytë angleze ose Championship pas humbjes 2-1 në fushën e tyre kundër Volverhempton Uonderers. Bolton Uonderers shpartalloi Uigan Atletikun 4 0 dhe Birminghem Siti e mori veten nga disavantazhi 0-2 duke barazuar 2-2 me Evertonin