Njohësit e proceseve të integrimeve evropiane dhe analistët për çështje politike në Prishtinë thonë se Bashkimi Evropian duhet të rrisë presionin karshi Beogradit zyrtar në lidhje me qasjen e tij ndaj Kosovës. Ndonëse hidhet poshtë mundësia që në të ardhmen e afërt njohja e shtetësisë së Kosovës t’i vihet si kusht Serbisë për integrim në BE, ata theksojnë nevojën për themelimin e bashkëpunimit rajonal ndërmjet dy vendeve.

Bashkimi Evropian nuk është i interesuar që me anëtarësimin e shteteve të reja në këtë mekanizëm të importohen probleme politike, thonë njohësit e procesit të integrimeve evropianë në Kosovë duke folur për rrugën e Serbisë dhe të Kosovës në Bashkimin Evropian.

Eksperti Shenoll Muharremi thotë se Serbia do të duhet ta zgjidhë problemin me Kosovën para se të figurojë në listën e shteteve potenciale për të hyrë në BE.

Megjithatë, ai hedh poshtë mundësinë që në këtë fazë hyrja në BE e Serbisë të kushtëzohet me njohjen e Kosovës.

“Serbia duhet ta zgjidhë çështjen me Kosovën para se të hyjë në BE. Nëse ajo do të pyetet, në faza më të vonshme, ta njohë Kosovën apo jo, është një çështje tjetër. Sido që të jetë, është edhe një perspektivë tjetër që në procesin e stabilizim-asociimit, u kërkohet shteteve që të kenë bashkëpunim rajonal”.

“Andaj, unë pres që, shumë shpejt, vendet anëtare dhe Komisioni Evropian të bëjnë më shumë presion te Serbia që të bëhet më konstruktive sa i përket Kosovës”, shprehet Muharremi.

Ditë më parë, ministri i Jashtëm i Francës, i cili në javën e ardhshme pritet të vizitojë Kosovën, Bernard Kouchner, tha se njohja e Kosovës nga Serbia nuk është kusht për integrimin e Beogradit në BE.

Mirëpo, ai theksoi rëndësinë e zgjidhjes së problemeve të Serbisë me të gjitha shtetet fqinje të saj.

Analisti politik, Driton Lajçi, thotë se megjithëqë Bashkimi Evropian nuk mund të flasë njëzëri në lidhje me Kosovën, për shkak të mosnjohjes nga pesë vende anëtare, deklaratat e zyrtarëve të BE-së përfshijnë dhe nevojën për përmirësimin e raporteve Beograd-Prishtinë.